LAJM I FUNDIT: Nuk pritet ulje e çmimeve të apartamenteve, kostot vijojnë të rriten

Çmimet e apartamenteve në Shqipëri pritet të mbeten në nivelet aktuale edhe gjatë muajve në vijim, pavarësisht pritshmërive të disa blerësve për një ulje të tyre. Ky është vlerësimi i Drejtorit Ekzekutiv të Shoqatës së Ndërtuesve të Shqipërisë, Erjon Harizi, i cili deklaron se rritja e kostove të ndërtimit, zhvlerësimi i euros, mungesa e fuqisë punëtore dhe barra fiskale vazhdojnë të ushtrojnë presion mbi tregun.

Sipas Harizit, edhe pse ritmi i rritjes së çmimeve është ngadalësuar krahasuar me vitet e fundit, nuk ka faktorë që të çojnë drejt një uljeje të tyre. Ai shpjegon se, nëse tregu analizohet në lekë, rritja nuk është aq e fortë sa perceptohet, ndërsa zhvlerësimi i euros e bën praktikisht të pamundur uljen e çmimeve të apartamenteve të shprehura në euro.

Një tjetër element që ndikon në çmimin final të banesave janë kostot gjithnjë e më të larta të ndërtimit. Sipas tij, përveç rritjes së pagave dhe mungesës së fuqisë punëtore, sektorin e rëndojnë edhe kostot e tokës, taksat, standardet më të larta teknike, projektimi dhe mbikëqyrja profesionale. Në disa projekte, pjesa që i takon pronarit të tokës mund të arrijë deri në 50% të vlerës së zhvillimit.

Z. Harizi thekson se tregu i ndërtimit gjatë vitit 2026 është stabilizuar, por nuk ka hyrë në rënie. Ai shton se muajt e verës zakonisht shoqërohen me një ngadalësim të shitjeve në Tiranë, ndërsa interesi për blerje rritet sërish me ardhjen e shtatorit.

Një nga sfidat më të mëdha për kompanitë e ndërtimit mbetet mungesa e fuqisë punëtore. Shoqata e Ndërtuesve vlerëson se mungesa e inxhinierëve, arkitektëve, teknikëve dhe punëtorëve të kualifikuar ka detyruar kompanitë të rrisin pagat, të investojnë në trajnim dhe të punësojnë punonjës nga jashtë vendit, duke shtuar më tej kostot e projekteve.

Harizi nënvizon gjithashtu se përdorimi i punëtorëve të huaj ka ndihmuar në mosvonesën e projekteve, por sjell kosto shtesë për dokumentacionin, akomodimin dhe trajnimin. Ndërkohë, ai thekson se cilësia e ndërtimeve në Shqipëri është përmirësuar falë zbatimit të Eurokodeve dhe standardeve europiane, duke e lidhur cilësinë me kontrollin teknik dhe përdorimin e materialeve të certifikuara, dhe jo me origjinën e fuqisë punëtore.

Lidhur me zërat për një mbingopje të tregut, Drejtori Ekzekutiv i Shoqatës së Ndërtuesve shprehet se nuk sheh shenja konkrete të një situate të tillë. Sipas tij, Tirana vazhdon të ketë kërkesë të lartë për banesa, ndërsa tregues si çmimet që nuk kanë rënë, qiratë në rritje, numri i kufizuar i apartamenteve të përfunduara për shitje dhe vazhdimi i financimit nga bankat tregojnë se tregu mbetet aktiv.

Në përfundim të intervistës për Ekofin.al, Harizi vlerëson se sektori i ndërtimit vazhdon të jetë një nga motorët kryesorë të ekonomisë shqiptare, duke kontribuar në Prodhimin e Brendshëm Bruto, punësim dhe zhvillimin e një game të gjerë sektorësh të lidhur me industrinë e ndërtimit. Sipas tij, për të ruajtur këtë kontribut nevojiten politika fiskale të qëndrueshme, procedura administrative më të shpejta dhe siguri juridike për investitorët.

• Sdílet na :

Ad