AL
EN
IT
ES
DE
RU
EL
PL
CS
Information
Kanë hyrë në fuqi rregullat e reja për ndërtimin dhe funksionimin e resorteve mikse në Shqipëri. Qeveria ka vendosur që në këto komplekse, të cilat ndërthurin aktivitetin turistik me njësitë e banimit, jo më shumë se 40% e sipërfaqes totale të ndërtimit të përdoret për banesa, ndërsa të paktën 60% duhet t’i dedikohet funksionit turistik. Sipas vendimit nr. 842, datë 5 nëntor 2026, të Këshillit të Ministrave, të botuar këtë të hënë, më 9 nëntor, në Fletoren Zyrtare, përcaktohen kritere të reja për projektimin, certifikimin dhe administrimin e strukturave akomoduese, me fokus të veçantë te resortet mikse. Vendimi përcakton se raporti 60% për turizmin dhe 40% për banesat do të përllogaritet mbi sipërfaqen totale të ndërtimit dhe jo mbi sipërfaqen e truallit ku zhvillohet investimi. Në përllogaritje do të përfshihen edhe ambientet dhe infrastruktura e përbashkët, të cilat do të ndahen proporcionalisht ndërmjet komponentit turistik dhe atij rezidencial, sipas funksionit dhe përdorimit të tyre. Apartamentet dhe vilat turistike nën administrimin e resortit Një tjetër ndryshim i rëndësishëm lidhet me mënyrën e funksionimit të apartamenteve, vilave dhe dhomave të destinuara për akomodim turistik. Sipas rregullave të reja, këto njësi në projektet e reja nuk do të mund të kategorizohen si struktura të pavarura akomoduese, por do të jenë pjesë e komponentit turistik dhe do të funksionojnë nën administrimin e përbashkët të resortit. Ndërkohë, njësitë e projektuara për banim nuk mund të përdoren automatikisht për akomodim turistik. Ndryshimi i destinacionit të tyre do të kërkojë përmbushjen e kushteve të legjislacionit për turizmin dhe zhvillimin e territorit. Certifikatë e detyrueshme përpara lejes së ndërtimit Vendimi vendos gjithashtu detyrimin që subjektet zhvilluese të pajisen me certifikatë paraprake kategorizimi përpara miratimit të lejes së ndërtimit për strukturat akomoduese. Kjo certifikatë do të lëshohet nga ministria përgjegjëse për turizmin dhe do të shërbejë për të verifikuar nëse projekti përmbush kriteret e kategorisë turistike përkatëse. Megjithatë, certifikata nuk zëvendëson lejen e ndërtimit dhe nuk i jep automatikisht investitorit të drejtën për të nisur punimet. Dokumentacioni i projekteve të resorteve mikse duhet të përmbajë një ndarje të detajuar të sipërfaqeve sipas objekteve, kateve dhe funksioneve, si dhe përllogaritjen e raportit ndërmjet pjesës turistike dhe asaj rezidenciale. Çfarë ndodh me projektet ekzistuese? Vendimi parashikon dispozita kalimtare për strukturat që kanë marrë më parë leje ndërtimi apo certifikata kategorizimi. Certifikatat ekzistuese për apartamentet, vilat, dhomat dhe struktura të tjera akomoduese ruajnë vlefshmërinë e tyre, ndërsa subjektet përkatëse mund të vijojnë aktivitetin sipas kategorisë së certifikuar, duke respektuar detyrimet ligjore. Rregullat e reja synojnë të përcaktojnë më qartë dallimin ndërmjet investimeve turistike dhe zhvillimeve rezidenciale, duke vendosur kufij konkretë për peshën që mund të zënë banesat brenda projekteve të resorteve mikse. Burimi: Fletorja Zyrtare e Republikës së Shqipërisë, VKM nr. 842, datë 5.11.2026, “Për përcaktimin e kategorive të strukturave akomoduese”.
